Waxaa jira caawimooyin badan oo kala duwan oo adiga iyo ilmahaaga loogu talagalay.

Adigaa go’aanka iska leh wakhtigay caawimadu bilaamayso.

Maskaxdaada waxaa ku jiri kara su’aalo badan iyo baqdimo.

Kuwaasna waan ka wadahadlaynaa

 Maxaa dhacaya, haddaad xaaladdaada u sheegto cid kale? Waxaa dhici karta, in qofka ku dilaa kuugu hanjabo inay wax ka daran kugu dhacayaan, haddii aad caawimo raadsato ama isku daydo inaad ka tagto. Carruurta miyaa loo hanjebaa? Waxyaabaha hore lagu soo sheegay oo dhan waa waxyaabo inta badan dhaca oo caadi ah oo uu ku kaco qofka qoyskiisa dagaalka ku hayaa. ha ka yeelin inay hanjebaaddu ku hor istaagto. Ka kac fadhiga. Si wadajir ah ayaannu kuula raadinaynaa, sidii laguu taageeri lahaa.

Sidee ugu adkaysataa

  Dagaalka qoyska dhexdiisa ka jiraa wuxuu keenaa culaysyo badan. Nolol maalmeedka caadiga ahi waxay noqon kartaa baqdin dagaal joogto ah oo ah sidii looga bixi lahaa dhibaatada. Dhibaatada waxaa looga bixi karaa, iyadoo lala xiriiro qolyaha kala duwan ee dadka caawiya, kuwaas oo ah xafiiska sooshalka ee xaafaddaada, rugta caafimaadka, rugta daryeelka hooyada iyo carruurta (neuvola), rugta la talinta qoysaska (perheneuvola), shaqaalaha xannaanada ama iskuulka carruurtaada. Booliskuna inuu ku caawiyo  waajib bay ku tahay.

Isticimaal geesinimadaada

Talaabada ugu horaysa ee geesinimada kaaga baahani waa, inaad dagaalka iyo hanjebaaddaad la kulantay u sheegto cid kale. Wakhtigan hadda la joogo waxaa jira shaqaale badan oo xirfadaha dadka caawiya ka socda oo aqoon fiican u leh dhibaatooyinka dagaalka qoysku leeyahay, waxayna awoodaan oo diyaar u yihiin inay arrinta kaala xaajoodaan.

GURIGA BADBAADADA EE ESPOO heegan

buu ku jiraa 24 saac

Guriga Badbaadada ee Espoo wuxuu maalin walba caawiyaa

dumar dilliin lagu sameeyey iyo carruurtooda

  Adigu xitaa ka mid baad noqon kartaa. Guriga badbaadadu wuxuu leeyahay telefoon heegan ah oo 24 saac ah. Wakhtiga adiga kuugu fiican baad soo wici kartaa. Haddaad rabto adigoon magacaaga sheegayn baad soo wici kartaa, inkastoo aannu marka ugu horaysaba ku leenahay adigu wax ceeb ah ma lihid, haddii aad la kulantay dilliin iyo hanjebaad ama dagaal xaga nafsada ah. Soo wac 09-5915130. Shaqaalaha heeganka ee guriga badbaadadu diyaar bay kuu yihiin, inay kula sheekeystaan.

Waad soo wici kartaa

  Si aad uga hadasho dareenkaaga, cidhiidhiga iyo baqdinta ku haysta. Si aad dadka fikrado isu dhaafsataan, talana aad u hesho. Guriga badbaadada waxaa kuu jawaabaya qof shaqaale ah oo u bartay inuu caawiyo dumar adigoo kale ah oo ku soo dhex noolaa qoys dagaal leh.

Waad imaan kartaa

  Oo waxaad la kulmi kartaa shaqaalaha guriga badbaadada, si aad ula hadasho, isulana qorshaysaan nooca caawimada ah ee aad diyaar u tahay in lagu siiyo. Adigana si wadajir ah ayaa laguula raadinaynaa noocyada kala duduwan ee caawimada ah.

  Guriga badbaadadu wuxuu ku yaallaa  Espoo, wuxuuna u dhow yahay Isbitaalka Jorvi, xaafadda Lippajärvi, Vanhan Turuntie iyo Guriga Aurorakoti nawaaxigooda. Cinwaanku waa  Espoon Turvakoti,  Jänismetsäntie 2,  02940 Espoo.

Guriga Badbaadada ee Espoo waad imaan kartaa si aad

macaamiil uga noqoto

  Inta  badan dagaalka qoyska dhexdiisu wuxuu keenaa, inay noqoto inuu qofku guriga ka tago. Dilliinkuna marba marka ka dambaysa wuu ka sii daraa, oo wuu ka sii khatarsan yahay. Dilliinka waa inaad wax weyn u aragtaa. Waxaa laga yaabaa inaad sahashato dilliinka adiga iyo ilmahaaga lagu hayo. Arrinta anaga nagala hadal. Qof ehelkaaga ahi nabadgelyadaada ma ka welwelsan yahay? Dilliinka lagugu hayo ma u sheegtay sooshalkaaga, dhakhtar, booliska ama shaqaalaha la talinta qoyska? Guriga badbaadadu waa meeshay tahay inaad timaado, haddii gurigaaga lagugu dilo, lagu kala tuuro, laguu hanjebo, hurdada laguu diido, laguu diido inaad carruurtaada daryeesho amaba haddii sidaadaba gurigaaga markaad joogto baqdin ku hayso.

  Guriga Badbaadada ee Espoo haweenta dilliinka lagu sameeyey ilmeheeday kula noolaan kartaa (ama iyadoon ilmaheeda wadan) si ay ugu baxdo wakhtigan dhibaatada leh ee dagaalka qoyska dhexdiisu keenay. Wakhtiga guriga badbaadada la joogaa wuxuu u dhexeeyaa dhawr maalmood ilaa dhawr bilood, mar walba waxay ku xiran tahay qofka baahidiisa gaarka ah.

Guriga badbaadada waa laga aadi karaa shaqada, iskuulka iyo xannaanadaba. Macaamiisha guriga badbaadada waxaa laga taageeraa waxyaabaha nolosha la xiriira, waxayna helaan adeegyada arrimaha bulshada iyo caafimaadka iyo adeegga looyarada. Hawsha guriga badbaadadu waa, inuu siiyo dumarka dilliinka la kulmay iyo carruurtooduba meel ay ku nabadgalaan, si ay ugu suurowdo isbeddelka ay u baahan yihiin, si ay uga baxaan nolosha dagaalka iyo dilliinka leh ee ay la soo kulmeen. Waxyaabaha caadiga ah ee guriga badbaadadu qabto waxaa ka mid ah arrimaha guri raadinta, arrimaha dalbashada furriinka, arrimaha masuuliyadda iyo la kulanka carruurta, geynta dacwada, waraysiyada booliska iyo su’aalaha la xiriira sidii lagu heli lahaa dhaqaalaha nolosha.

* Dagaalka qoysku waa dembi hoostaga xeerilaaliyaha sharciga ah

* Dagaalka qoysku xuquuqda bini-aadannimaduu ka soo horjeedaa

* Ma aha inaad ogolaato dagaalka qoyska

* Dagaalka qoyska waa laga raystaa

La soo xiriir

  Muddo dheer ayaannu caawineyney dumar dilliin lagu sameeyey, oo waxaannu ka hellay aqoon badan oo aad adigu ka faa’iideysan karto.

  Ururka Caawimada Dumarka ee Espoo waa urur ay dumar aasaaseen, si ay uga soo horjeestaan dilliinka dumarka lagu sameeyo. ururka waxaa la diwaangeliyey sannadkii 1980.

  Guriga Badbaadada ee Espoo waxaa la furay 1.1.1983 si uu u noqdo meel lagu badbaadiyo dumarka dilliinka lagu sameeyey iyo carruurtooda wakhtiga dhibka degdegga ahi hayo. Guriga badbaadadu wuxuu leeyahay toban qol oo la deggen yahay iyo meel lagu cunteeyo iyo meel fadhi ah o dadka ka dhexeeya.

  Gurigan badbaadada maamulidiisa mooyee, ujeeddada ururku waa fulinta sidii aqoonta guud loo gudbin lahaa, iyadoo la qabanqaabinayo shirar, koorsooyin, munaasabado wax laga soo jeediyo laguna wadahadlo, iyadoo saamayn lagu yeelanayo hadalka saxaafadaha lagu soo bandhigo iyo iyadoo qoraalo daabacan la samaynayo.

  Ujeeddada ururku waxay kaloo tahay in saamayn lagu yeesho sharciyada degsan, shaqaalaha maamulka iyo qolyaha degmooyinka ee goaamada gaadha , sida loo saamaynayaana waa iyadoo waxyaabo loo soo jeedinayo warbiximana la siinayo. Ururku wuxuu rabaa inuu la shaqeeyo hay’adaha kale ee u dhigma iyo qolyaha kale ee maamulka dowladda iyo kuwa iskaa wax u qabso ku shaqeeya ee ka soo horjeeda dilliinka dumarka lagu sameeyo.